Aeschbacher Philipp & Jasmin aus Frauenkappelen

Tschou zämä, liebs Radio Bern 1 & Telebärn Team Mir, dr Philipp und Jasmin bewärbe üs vouer Stouz und Fröid bi euch für eue super Wettbewärb für die neui Troumchuchi. Würum das mir das verdient hei? Erschtens isch das Buurhuus wos drum geit ize bereits im Bsitz vor 14.te Generation u wird hüür 200 Jährig - u würum das nid grad mitere neue Troumchuchi fiirä?. Zwöitens hei mir ide letschte Jahr ä ganz ä schwärä verluscht müessä verzeichne. Leider isch mi gliebt Papi, wo das Huus jahrelang het im Schuss ghaute u aues het gä für mini Familie, em Hof u für Tier are schwäre Chrankheit verstorbe. Vo Hüt uf Morn simer ohni Ihn da gstange und hei auii Chraft womer hei gha müessä bündle, so dass mir üses gliebte Heimet ou witerhin dörfe phaute, ehrä und bewohne. Mir hei quasi ä 3.5 jähregi Pächssträhne hinger üs.. Drittens sy mi Maa und ig immer für auii da. Wär üs kennt, weis das. Mir luege immer zersch dases aune drum ume guet geit, u när de ersch uf üs. Üsi Tüüre stöh für auii immer offe. Viertens giz für üs beidi nüt schöners aus gmeinsam z Choche. Mir prügle üs fasch jede Abe drum, wär das iz darf choche, u drum düemer meischtens immer grad zämä. Füftens hei mir üs am 18.8.18 z «Ja» Wort ir Chuchi gä. Das isch ke witz ;o) Gsehter, so wichtig isch üs ä schöni Chuchi... mir heise quasi grad mit Ghürate.. nid schlächt, oder? Mir hei ou gseh, dass kener Neuboute erloubt sy. Fakt isch aber, dases ke Neubou isch. Mir verleihe am 200 Jahr aute Buurehuus nume äs schöners Inneläbä. Z Huus besteit, d Chuchi mues so oder so ine. Drum hoffe mir würklech ganz fescht, dass mir die grossi ungloublechi Chance vo euch dörfe wahr nä und bis iz Voting chöme. U für dasi euch no chli meh Honig cha ums Muu schmiere, hani mini Kreativität mitem fogendem Text la sprudle... (ha drum dänkt me darf de es Bewärbigsvideo mache - de hättemer de das mitem Text unger gmacht.. u i wottnech dä nid vorenthaute). Viu spass bim läsä :o) Ä Brandneuii Chuchi für üses «Frei-Berg-Haus» wär ä Troum, wo ja villech scho bau chönt i Erfüllig ga? Ir momentane Chuchi hani z Problem, das ig mi Gross «Buser» immer wider nöime aschlah. Das duet weh, isch eklig u schreit nachere neue, grössere Chuchi wo das nüm passiert ;o) Mi Maa tröimt ou scho drvo, ä früsche Fisch usem «Ursenbacher» z mache... oder äs saftigs «Ochsenbei» im neue «Hofer» vo Electrolux zue z bereite. U da d Grät vo Electrolux gsponseret wäre, besteit sicher o ke Gfahr dases eim vor luuter saftigkeit grad iz «Z'augg» sprützt. Die hei das nämlech scho im Griff bi Electrolux. Steuetnech mau nume dr «Duft» vor wo ir Chuchi umeschwäbt. Eifach "Ries(en)"ig. Ig würd de drwile ä chli Basilikum vom Töpfli «Flückiger» füre Tomatesalat wos de drzue söu gä.. Mitem Topflappe, nei nid dä us Silikon, sondern dä us «Frick» eh, Strick nämemer das «Ochsebei» usem Ofe u lös üs la guet ga. Fürs passende Gschirr für es feins ässä isch gsorgt, das chunt nämlech vom «Pfister». I gseh üs, wie mir im Ässzimmer höcklä, fein Ässä u dr Blick usem Fänschter zu üsem «Baumgartner» länkt. Dä Boum womer zum Hochzyt hei übercho heimer nämlech säuber i üse Garte Gartneret. Würum Hochzyt?... Dert wo die nöii Troumchuchi söu stah, dert isch eigentlech üsä aut «Scheurer» - u wüsst dir was mir dert hei gmacht? Mir hei üs genau ä dam Platz am 18.8.18 z Ja Wort gä. I meine, wär hüratet scho i sire eigete Chuchi? (siehe Bild) Das söu euch ou ufzeige, weli Bedütig ä neuii Chuchi für üs hät. Mir garantiere euch, mir würdese fescht gniesse, üsi Troumchuchi. Im Winter aber ou im «sommer-haud-der». Mit däm Textli, wo doch dr eint oder anger bekannt Name vo euem tolle Team vorchunt verabschide mir üs und hoffe ufne guete Bscheid. Merci viu mau. Gruess vom Wohleibärg. Philipp & Jasmin