Ende des EU-Deals hat Folgen für die Schweiz

D Schwiz het ds Rahmenabkomme mit dr EU beärdiget. Nach siebe Jahr Verhandlige isch dr Bundesrat geschtr zum Schluss cho: Es het ke Sinn me - d Üebig wird abbroche. BERN1-Reporter Tobias Karlen, dä Entscheid, dä het Folge für d Schwiz. Und di erschte hei das o scho z gspüre becho? >>> Das Ende fürs Rahmenabkommen hat Folgen - TK 1 Ja und zwar d Schwizer Med-Tech Branche. Also Unternehme wo zum Bispiel Hörgrät oder Hüftimplantat produziere. Sie hei dankeme Abkomme bis etz ihri Produkt ohni grosse Ufwand id EU-Staate chönne liefere. Sit geschtr gälte ir EU i däm Beriich aber neui Bestimmige. D EU het ds entsprechende Abkomme mit dr Schwiz nid erneueret. Und das heisst jetz für d Hörgrät-Produzente: Meh Papierkram bim Exportiere und Importiere. Bedütet: Es choschtet se meh. Und am Endi chönte d Produkt ir Schwiz tüürer wärde. Es ähnlechs Schicksal blüeht bald o andere Branche, well all die Abkomme usloufe. Dr Bundesrat probiert zwar, die negative Folge abzfädere - aber das isch Pflästerli-Politik, UND d am Schluss muess o d EU entscheide, ob sie sone Lösig akzeptiert oder nid. Ds gschiterete Rahmenabkomme betrifft aber nid nume d Wirtschaft, o d Stromversorgig und d Forschig stöh vor unsichere Zite? >>> Das Ende fürs Rahmenabkommen hat Folgen - TK 2 Ja d Schwiz wot ja sit langem es Stromabkomme mit dr EU. Zwar si scho hüt viel Stromleitige mit de Nachbarstaate und drmit mitem EU-Stromnetz verbunde. Es fählt aber es Abkomme. Das macht dr Handel vom Strom schwieriger - und gfährdet d Strom-Sicherheit ir Schwiz. Im Winter zum Bispiel chunt 40 Prozent vo üsem Strom usem Usland. Ohni es richtigs Abkomme drohe Stromusfäll. Und ja, d Forschig isch o betroffe. Ohni Rahmenabkomme isch d Schwiz jetz afe mal vom EU-Forschigsprogramm usgschlosse - das heisst es git ke Geld und d Schwiz isch bi grosse Forschigsprojekt nid drbi…